إذا كان لديك الموهبة والطموح لدخول عالم التمثيل وممارسة هذه المهنة فلاتظن أن ذلك سيكون بالأمر السهل. لديك العديد من التحديات والصعوبات التي يتوجب عليك تجاوزها لدخول عالم التمثيل من أوسع أبوابه.
لذلك يقدم لنا الفنان القدير باسم ياخور مجموعة من أهم النصائح، كما يقدم إجابة عن أهم الأسءلة التي تدور في ذهن كل من أراد دخول عالم التمثيل.
الإجابة عن أهم التساؤلات لدخول عالم التمثيل
يحاول الفنان باسم ياخور في بداية حديثه الإجابة عن أهم التساؤلات التي قدر تتبادر إلى أذهان العديد من عشاق الفن. وخاصة ً أولئك الذين تراودهم هواجس دخول عالم التمثيل.
1- هل بداية التمثيل كدراسة أكاديمية هي شرط أساسي لتصير ممثل؟
الجواب: لا، أكيد الدراسة ليست شرط أساسي حتى الشخص يكون ممثل وممثل ناجح.. والأمثلة كثيرة بالعالم.. كثير من الممثلين العالميين لم يدرسوا التمثيل دراسة، وأصبحوا ممثلين مهمين جداً في عالم السينما والتلفزيون وغيرهم. حتى في الدراما السورية يوجد أسماء من عمالقة الدراما السورية لم يدرسوا دراسة أكاديمية ولم يكن المعهد أصلاً موجود. أسماء كثيرة مثل الأساتذة: سلوم حداد، بسام كوسا، عباس النوري، السيدة منى واصف. ومن الجيل الجديد: كاريس بشار، نورمان أسعد، سلاف فواخرجي وغيرهم الكثير، تميزوا بكثير من الأدوار المهمة وعملوا شخصيات لا تُنسى. فالدراسة إذا ليست شرط أساسي لكي تصبح ممثل ناجح إذا كانت الموهبة موجودة عندك.
2- شو الشي يلي بتحتاجوه لحتى تصيروا ممثلين؟
أول شي وبشكل بديهي.. الموهبة
3- وممكن تصير ممثل إذا ما عندك موهبة؟
بالوقت الحالي.. ممكن.. إذا توفر عندك.. الحظ والشكل المناسب لهالشي.. أو إذا كان أحد من الأقرباء (البابا، خالتو،عمتو) بيشتغلوا بالوسط الفني أو بيعرفوا حدا قادر يفرضك.
4- هل يكفي وجود الموهبة كافية لحتى تصير ممثل ناجح؟
أكيد لا.. لأن الكثيرين من الناس الموهوبين لم يصبحوا ممثلين ناجحين وضاعت موهبتن عالفاضي.. لأن الإنسان بحاجة إلى فرصة لكي يظهر موهبته وبهالخصوص في عدة طرق..
خطواتك الأولى لدخول عالم التمثيل.. أول طريقة لإظهار الموهبة:
1- الدراسة:
في سوريا معهد عالي للفنون المسرحية، الناس تدرس فيه وتتخرج وبتبدأ تاخد فرص بشكل تدريجي وبعضها ما كتير بياخد فرص.
2- الواسطة:
يكون عندك واسطة قوية بتقدر تقدمك بشكل جيد وتحرق خطوات معينة لحتى توصلك للمكان اللي بدك ياه.
3- الإصرار والابتكار:
الإصرار إنو يكون عندك الإرادة الحقيقة لتوصيل موهبتك بأي شكل من الأشكال والابتكار هو ابتكار طريقة أو شكل تعرض فيه موهبتك للناس. وفي كتير شباب نجحوا لأنهم عملوا فيديوهات نشروها على مواقع التواصل الاجتماعي وحققوا من خلالها نجومية كبيرة وشهرة وقدروا يفرجوا الناس موهبتن.
مجالات التمثيل.. دليلك لدخول عالم التمثيل
هلئ خلونا ندخل بصلب الموضوع، لحتى تصير ممثل في مجموعة من النقاط المهمة لازم تكون بتعرفها منيح، أول شي الفرق بين التمثل المسرحي والتمثيل السينمائي أو التلفزيوني:
وهنن نوعين مختلفين عن بعضهم اختلاف شاسع جداً، حتى طلاب المعهد العالي للفنون المسرحية اللي بيدرسوا خلال 4 سنين دراسة أكاديمية لها علاقة بالمسرح. بآخر سنة من الدراسة بيدرسوا مادة اسمها تقنيات السينما والتلفزيون تهيأهم لحتى يصيروا ممثلين تلفزيونين أو سينمائيين. فالحالتين مختلفات تماماً، كيف هنن مختلفات؟
التمثيل المسرحي
الأداء المسرحي يعتمد على النبرة العالية على إطلاق الصوت بشكل واضح جداً لأن المسرح قدامك إذا كان في 300 شخص وأنت ممثل مسرحي، لازم آخر شخص جالس بآخر صف بالمسرح يسمع صوتك بشكل واضح وما يكون في كلام ضايع منو، لازم يكون الصوت جهوري على خشبة المسرح.
التمثيل التلفزيوني
أما بالإداء التلفزيوني ما مطلوب منك أبداً يكون صوتك جهوري أو يوصل لمدى بعيد، حتى لو همست همس هاد الشي رح يكون مسموع وبشكل واضح بواسطة الميكروفون الذي تضعه. على العكس تماماً إذا بدك تصرخ أو في مشهد يتطلب منك أنك تطلع بمستوى الصوت، لازم تنبه مهندس الصوت لحتى يزبط عياراتو أو ينضرب المشهد كله.
وسائل التعبير.. فروقات جوهري بين المسرح والتلفزيون
الآن بعد أن تكلمنا عن الصوت سنتكلم عن استخدام وسائل التعبير إن كان بالوجه أو بالجسد:
على المسرح وسائل التعبير تختلف، المسرح يعتمد بالأداء على الحركة العريضة (حركات وإشارات عريضة باليدين والجسم وحتى بالوجه)، والمكياج حتى يكون فاقع أو واضح كتير والثياب نفس الشي.
عكس الشي التلفزيوني، بالتلفزيون ليس مطلوب منك تحريك يديك بحركات عريضة أو تشتغل على إيماءات كتير واضحة وصريحة بوجهك. يعني إذا عم تأدي أداء مسرحي على خشبة المسرح والناس انبهرت فيك وزقفلك الجمهور ما بالضرورة هاد الأداء نفسه أمام كميرا تلفزيون يقلك الجمهور عليه برافو. بالعكس بجوز يعتبرك عم تبالغ كتير وإنو هاد الأداء مالو مقنع أبداً.
وبالتمثيل التلفزيوني في حجوم مختلفة ولقطات من أنواع مختلفة، في الـ American shot وفي اللقطة المتوسطة وفي اللقطة القريبة وفي الـ close وفي الـ extreme close.
وهذا يعني إذا كانت الكاميرا كتير آخدة كادر قريب على قد وجهك لترسم تعابير معينة بعيونك ما بصير تعمل أبداً ريأكشنات مسرحية وإلا تصبح الشخصية فيها نوع من الجنون.
الفرق في الأداء بين التمثيل المسرحي والتمثيل التلفزيوني:
(مشهد تمثيلي يوضح الفرق)
الآن سأتكلم عن فكرة الحد الأمثل في الأداء:
هو لما تأدي حالة معينة تخدم هذه الحالة تماماً مثل ما تتطلبه. لا أزود بحيث تبين مبالغة، ولا أنقص بحيث تبين جامد وما قدرت توصل للحد المطلوب منك كممثل.
نصيحة خاصة لدخول عالم التمثيل
بدي أعطي نصيحة للي بدهن يشتغلوا بهذه المهنة:
من خلال تجربتي الشخصية، إذا بدك تأدي حالة ولقيت من الصعب جداً توصل للحد الأمثل لهالحالة، نقّص الحالة شوي ولا تزيدا لأنك إذا زدتها رح تدخل بشكل مباشر بخانة التصنع والمبالغة.. واللي عم يتفرج عليك رح يقولوا يا لطيف شو مفتعل.
أما إذا نقصت شوي فهاد الشي ممكن يمر وما يلاحظه المشاهد، بشرط إنك ما تنقص كتير وتدخل بحالة من الجمود.. واللي عم يتفرج يقول أي شوه الحيط ما عندو جنس المشاعر بالمرة.
لذلك الخلاصة: دائماً الحد الأمثل أزود (لا)، أنقص شوي (ممكن).
تساؤلات أخرى عن دخول عالم التمثيل
هل استخدام المرآة في التمثيل صح أو خطأ؟
كثير من الممثلين اللي اشتغلوا على حالهم بموضوع التمثيل كانوا يوقفوا قدام المراية ويتطلعوا لتعابير وجههم بالمراية ويعملوا مثل تجارب على طريقة البكاء، طريقة الضحك، طريقة الزعل أو الغضب.. يدرسوا نظراتن بالمراية وأنا منهن. ببداية حياتي المهنية كنت وقف قدام المراية وأعمل مشهد معين وشوف لأي حد أنا كنت قدران كون مقنع أو بلشت بين كذاب.
كثير من أساتذة التمثيل يعتبرون المراية هي مالها الأسلوب الأمثل أو الناجح لحتى تطور أدواتك. أنا شخصياً ضد هالحكي، والمراية ساعدتني كثيراً على فهم تعابير وجهي وما هو الحد الأمثل فيه. بس أكيد بوقتنا الحاضر نحنا لم نعد محتاجين للمراية، لأن ببساطة فيك تحط موبايلك وتصور مقطع إلك بأي حجم بدك ياه. وهاد المقطع بتشوفه أنت وبتقيمو أو تفرجيه لأصدقائك وعائلتك وتاخد رأيهم وتسألهم، أي مقطع كان أدائي مقنع فيه أكثر؟
ما هو أصعب شيء في التمثيل، البكاء، الضحك؟
هذا يعود لكل إنسان وطبيعته، أنا مثلاً بشوف إنو الضحك بالتمثيل هو أصعب شيء، إذا لم تستطع توصيل الضحك بشكل صحيح فبتبين تماماً إنو الضحكة مو طالعة من قلبك وإنو مصطنعة ومفتعلة.
دخول عالم التمثيل؛ شو الشي التاني الصعب كتير بالتمثيل؟
الكونترول (التحكم باليدين)، جرب وقف واحكي بأي فكرة وأي موضوع، فتجد يديك لا شعورياً تتحرك يمين ويسار وعم تحرك حركات أحياناً مالها أي طعمة.
بالتمثيل يديك لازم تحرك بشي يناسب الكلام المنطوق، وشي يناسب محور الحدث اللي عم يصير، أو بتكون حركة يديك مجانية ومالها أي طعمة، جرب شي مرة وأنت قاعد أو عم تأدي أي مشهد تمثيلي إنك تقول مارح حرك يدي تماماً وتخليهن بشكل ثابت.
رح تلاقي صعوبة كبيرة وبدك بالضرورة إما تهزهن أو تحركن أو تحرك أصابيعك، لأن ارتبط الكلام والأداء دائماً عنا بموضوع حركة اليدين، الشطارة عند الممثل هي أن يوظف حركة يديه تماماً بالمشهد الذي يؤديه، ويستخدم إشارات مطلوبة منه، وليست إشارات مجانية هي عبارة عن حركة يديه مع الحكي.
وحدة من الشغلات الصعبة جداً بالتمثيل، والتي لا تتطلب حكي أبداً، هي الريأكشنات، لأن بالتمثيل التلفزيوني المشهد لا يؤخذ كله مع بعضه مرة واحدة. يعني أنا عم احكي حكي واللي قدامي عم يحكي جمل تانية عم يرد فيها علي، هدول بيتصوروا لحال وهدول بيتصوروا لحال. جمله لازم يكون إلي عليها ريأكشنات، وجملي لازم يكون له عليها ريأكشنات. والرياكشنات هي تتصور لحالها منفصلة، يعني تماماً التصوير يصبح بالشكل التالي، (مشهد تمثيلي يوضح الفرق).
ما هي الموهبة الحقيقية التي تؤهلك لدخول عالم التمثيل؟
آخر شي بدي احكيه بفيديو اليوم، هو عن كثير من المقاطع التي تصلني من الكثير من الأشخاص اللي حابين يفرجوني إمكانياتهن ومهاراتن بالتمثيل، فبيعملوا أداء فيه صراخ، أداء فيه تصاعد كثير، وبيستخدموا لهجات؟
هل الصراخ وارتفاع الصوت والتمكن من استخدام اللهجات المختلفة دليل على الموهبة؟
مو بالضرورة، إنك تتصاعد بالأداء وتقول أنا عم أدي بشكل كتير منيح، هذا ما بخليك تصير ممثل.
التصاعد الغير مبرر ما بالضرورة يحطك بخانة الممثل الجيد. أحيانا عشر كلمات بشكل هادئ جداً وبمكانه الصح يكون تأثيرهن على المشاهد أقوى بكثير من معلّقة بالصراخ لا تحرك مشاعره على الإطلاق. منيح أن يكون عندك مهارات باللهجات بعد ما تصير ممثل. أما أن يكون لديك مهارات باللهجات هذا الشيء لا يجعلك تصير ممثل. لازم تكون بتعرف تمثل أولاً وهديك إضافات.
وقبل الختام:
كيف تبكي بالتمثيل؟ وتكون مقنع تماماً للي عم يشوفك؟ وبتصير تعاطف المشاهد معك؟. كيف تركب تفاصيل الشخصية؟ من وين بتجيب هالتفاصيل؟.. وشلون بتعمل شخصية ناجحة جداً ومؤثرة كتير؟
شو هي أهم النصائح والإرشادات اللي فيني فيدكن فيها وأعطيكم ياها قبل ما تحضروا حالكم لتقدموا على المعهد العالي للفنون المسرحية.. كل هذا سأتكلم عنه بالفيديو القادم.
باسم ياخور
وقد كانت هذه أهم النصائح وأهم الإجابات على معظم التساؤلات التي تراود العديد من الأشخاص الذين يجدون في أنفسهم الموهبة والشغف الحقيقي بمهنة التمثيل. والتي قدمها لنا الفنان والممثل القدير باسم ياخور أحد أهم نجوم الدراما السورية والعربية.